آخر تحديث: سبتمبر 2026
1. البيانات اللي بنجمعها
- بيانات البائع: الاسم، البريد الإلكتروني، رقم الهاتف، كلمة المرور (مشفّرة).
- بيانات المتجر: اسم المتجر، الفئة، الوصف، صور المنتجات والمتجر.
- بيانات حساب العميل: الاسم، البريد الإلكتروني، رقم الهاتف، وعنوان التوصيل لو حفظته في حسابك، وصورة الحساب لو دخلت بجوجل.
- بيانات الطلبات: المنتجات والكميات، والاسم والهاتف والبريد والعنوان والمحافظة اللي بتكتبها وقت الطلب، وطريقة الدفع، وسكرين شوت التحويل لو دفعت بإنستاباي أو محفظة.
- التقييمات: التقييم والتعليق اللي بتكتبه على متجر، وبيظهر للزوار باسمك.
- بيانات استخدام أساسية: عدد الزوار المختلفين لصفحة المتجر وعدد مشاهدات كل منتج، لعرض إحصائيات للبائع. بنعدّهم برقم عشوائي مجهول متخزّن في كوكي (شرحه في البند 4)، مش باسمك أو بحسابك.
- تطبيق التجار على أندرويد: لو فعّلت الإشعارات، بنحفظ رمز الجهاز اللي بيدّيه Google (Firebase Cloud Messaging) مربوط بحسابك، عشان نبعتلك إشعار بالطلبات الجديدة. بيتمسح لما تسجّل خروج من التطبيق أو تحذف حسابك.
- الدولة: بنعرفها من كود الدولة في رقم تليفونك. ولو سجّلت بجوجل من غير رقم، بنعرفها من عنوان الـ IP وقت التسجيل (الدولة بس، مش العنوان نفسه)، لإحصائيات المنصة.
2. إزاي بنستخدم البيانات دي
- تشغيل حسابك ومتجرك، وتسجيل الدخول بشكل آمن.
- توصيل بيانات الطلبات من العميل للبائع صاحب المتجر عشان يجهّز الطلب ويوصّله.
- بعت فاتورة الطلب وإيميلات بحالة الطلب والدفع للعميل، وإيميل تغيير كلمة المرور لما تطلبه.
- حساب إحصائيات المبيعات والعمولة الظاهرة في لوحة التحكم.
- التواصل معاك بخصوص حسابك لو حصلت مشكلة أو تحديث مهم.
3. فين بتتخزن البيانات
بيانات الحسابات والمتاجر والطلبات مخزّنة على Firebase (خدمة تابعة لـ Google)، وصور المنتجات والمتاجر وإثباتات التحويل مخزّنة على Cloudflare R2، والموقع نفسه مستضاف على Vercel. المنصة بتستخدم Firebase Authentication للتحقق من هوية المستخدم وقت تسجيل الدخول.
4. اللي بيتحفظ على جهازك
- رمز الدخول: بعد تسجيل الدخول، بيتحفظ رمز دخول (token) في متصفحك (localStorage أو sessionStorage حسب اختيارك "تذكرني") عشان نعرف إنك مسجّل. بيتمسح لما تسجّل خروج.
- كوكي الزائر (hc_vid): رقم عشوائي مجهول بيفضل سنتين، بنستخدمه بس عشان نعدّ الزوار المختلفين للمتجر من غير ما نعدّ نفس الشخص كذا مرة.
- نسخ من الصفحات العامة والصور: متصفحك بيحتفظ بنسخة من صفحات المتاجر والصور عشان تفتح أسرع وتستهلك باقة أقل، وبيتأكد إنها لسه محدّثة قبل ما يعرضها.
سلة المشتريات وطلباتك وبيانات حسابك مش بتتحفظ على الجهاز: بتتحفظ على حسابك بس، فمحدش بيشوفها لو حد تاني فتح نفس الجهاز. ومفيش عندنا أي تتبّع إعلاني أو كوكيز لجهات تانية.
5. مشاركة البيانات مع أطراف تالتة
مش بنبيع أو نأجّر بياناتك لحد. البيانات بتتشارك بس مع مزودي البنية التحتية اللي المنصة شغالة عليهم بقدر ما يلزم لتشغيل الخدمة:
- البائع صاحب المتجر: بيشوف بيانات طلبك (الاسم والهاتف والعنوان) عشان يوصّله.
- XPay وفواتيرك (Fawaterak): بوابات الدفع اللي البائع بيدفع بيها للمنصة (شحن الرصيد واشتراك الباقة)، وبتستلم المبلغ واسم البائع وإيميله ورقم موبايله. بيانات الكارت بتدخلها على صفحة البوابة نفسها ومبتوصلناش، ومبنبعتلهاش أي بيانات عن عملاء المتاجر.
- Google (Firebase): تخزين البيانات وتسجيل الدخول، ومنها تسجيل الدخول بحساب جوجل، وتوصيل إشعارات الطلبات لتطبيق التجار.
- Cloudflare R2: تخزين الصور.
- Vercel: استضافة الموقع وتشغيله.
- Resend: إرسال الإيميلات (الفواتير وحالة الطلب وتغيير كلمة المرور).
ومحدش غير الجهات دي بيوصله بياناتك.
6. حقوقك
- تقدر تعدّل بياناتك الشخصية في أي وقت من صفحة حسابك أو لوحة التحكم.
- تقدر تحذف حسابك بنفسك من إعدادات الحساب، وهيتم حذف بياناتك المرتبطة بيه (سجلات الطلبات بتفضل عند المتجر لأغراض المحاسبة). الخطوات بالتفصيل في صفحة حذف الحساب.
- لو نسيت كلمة المرور، تقدر تغيّرها من صفحة نسيت كلمة المرور.
- تقدر تطلب نسخة من بياناتك المخزّنة عندنا بالتواصل مع الدعم.
7. أمان البيانات
كلمات المرور متخزّنش عندنا كنص عادي — بيتم التحقق منها عن طريق Firebase Authentication. الوصول لبيانات لوحة التحكم محمي برمز دخول (token) وبيتحقق من صلاحية الحساب في كل طلب. روابط تغيير كلمة المرور صالحة لمدة ساعة ولمرة واحدة بس، وتغيير كلمة المرور بيخرّج الحساب من كل الأجهزة.
8. تعديلات على السياسة
ممكن نحدّث سياسة الخصوصية دي من وقت للتاني عشان تعكس أي تغيير في طريقة تشغيل المنصة. أي تعديل جوهري هيتم الإعلان عنه على المنصة.
لو عندك أي سؤال عن بياناتك أو عايز تطلب حذفها، تقدر تتواصل معانا من
صفحة تواصل معنا.
